boboder

澤尻＋倖田玩晒藝能界

聖誕過咗，新年就在眼前，大事回顧式新聞節目都不斷播出了 。
上週見濱崎步喺香港昂首闊步，排場依然架勢，邊想到日本天后其實執晒位，06樂壇吸水王係倖田來未，步姐？提都無人提。另一奇葩是靠眼淚入屋的澤尻繪理香。唔使三個月，教識我們尻字讀音為敲，快過靈格風呀。

CM女王澤尻繪理香 

韓國有個崔智友（即係《天國的階梯》患眼癌那個）。日本就有澤尻繪理香呢個重型催淚彈。《1公升眼淚》本週六大結局，喊埋今集終於完事，要捧澤尻場唯有希望TVB會買埋改編《新不了情》的電視劇《太陽之歌》。

澤尻有幾人氣？香港雅虎熱門搜尋中，澤尻之名逗留榜上起碼三個月，廣大網民對佢真係極之好奇。在日本，澤尻亦是去年急上位。《1公升眼淚》收視過20點，以角色雨音薰名義唱的《太陽之歌》同名單曲又大賣48萬張，是06年細碟十大銷量榜中唯一一位女歌手。人氣帶來的bonus是大加價。廣告價本來只是2百萬港元的她，去年大幅起價至330萬港元，屬眾女星升幅最大，身價與伊東美咲（愛瑪仕小姐）、松隆子看齊。20歲，做過水著女星有料性感，著番衫又識唱歌又有演技，大把世界。
 
8億天后倖田來未

8億，計円都兌5千幾萬港幣，何況說的是8億港元。
樂壇天后倖田來未06年搵了8億港元（127億円），成為唯一的吸水過億藝人，過億女藝人寶座更是3年未有人登上。
本來對倖田來未無好感，人靚，無佢份；聲，亦唔見特別甜，搶鏡的只有胴體，蔡依林都係有樣學樣，身上的布可免則免。身體以外倖田仲有咩值得欣賞？我就鍾意佢夠鬥心。周身肉難當舞林歌手，於是晚晚6點後唔食嘢，卒之搵番線條保住飯碗。自知五官嚇人，便以身體引開觀眾視線，加埋挑逗熱舞，殺出性感型女（日語發音Erokakoii）新血路。
06年，包括美甲女王、最佳牛仔褲女藝人等豬肉獎，倖田共掃15個獎盃返屋企。精選大碟大賣176萬張，CD、DVD埋單計落總銷量達8億港元。我係佢，會唔睇鐘想食就食，即使唔係袋晒8億，四肢斷晒都應該可以豪華地食過世，天后做過就算，好似步姐咁人氣跌晒仲要扮殿堂就？啦。